Vorferð Þórunnar hyrnu
Það var dagskrár- og skemmtinefnd sem skipulagði ferðina og tókst hún afbragðsvel þrátt fyrir slyddu og dumbungsveður. Gert var ráð fyrir fræðslu og skemmtun á hverjum viðkomustað og sá fyrsti var Þorgeirskirkja við Ljósavatn. Þaðan var haldið í Dimmuborgir og rölt einn hring. Athygli vakti rjúpnapar, rjúpan á hreiðri en karrinn á varðbergi og vék ekki frá kellu sinni þó að Zontakonur nálguðust hana.
Því næst var farið í Vogafjós og þar snædd dýrindis kjötsúpa sem óhætt er að mæla með. Þaðan var svo haldið í Jarðböðin vinsælu og það voru sælar og glaðar konur sem óku í Fuglasafn Sigurgeirs að Ytri-Neslöndum í Mývatnssveit. Það er frábært safn í áhugaverðu húsi en auk allra fugla Íslands utan eins er þar bátasafn í sérstöku húsi auk safngripa sem tengjast silungsveiði í Mývatni bæði að sumri og í gegnum ís að vetri.
